როგორ ხდება ინფორმაციის მოძიება, დამუშავება და გავრცელება, კადრების თანმიმდევრობის განსაზღვრა, ინტერვიუს ჩაწერა და რა დროშია ეს ყველაფერი შესაძლებელი? – ეს იყო ის მთავარი კითხვები, რაც NEO TV – ში სტუმრად მყოფმა მოზარდებმა ამ ორგანიზაციის წარმომადგენლებს დაუსვეს. ონალინ მედიის ოფისში, გორის მე-8 საჯარო სკოლის მე-5 (ბ) კლასის მოსწავლეების ვიზიტი მათი კლასის დამრიგებელმა, ნანა სხირტლაძემ დააორგანიზა. როგორც აღმოჩნდა მოსწავლეთა შორის ისეთებიც იყვნენ, რომლებსაც სამომავლო პროფესიად სწორედ ჟურნალისტობა აქვთ არჩეული. NEO TV- ს გუნდმა მოზარდებს ადგილზე გააცნო მედიის მუშაობის სპეციფიკა და ჟურნალისტიკის როლზე ესაუბრა.
“ჟურნალისტის პროფესია ყოველთვის დიდ ინტერესს იწვევს საზოგადოებაში, განსაკუთრებით კი ბავშვებში. უჩნდებათ კითხვები, რა ხდება ცისფერი ეკრანის მიღმა, ვინ არიან ადამიანები, ვინც ინფორმაციას გვაწვდიან, ამზადებენ რეპორტაჟებს, სად იღებენ სიუჟეტებს და ა. შ. უამრავი შეკითხვა ჰქონდათ ბავშვებს ამ სფეროს ირგვლივ. დღევანდელმა შეხვედრამ მოსწავლეებს საშუალება მისცა ყველა შეკითხვაზე ამომწურავი და საინტერესო პასუხები მიეღოთ, რისთვისაც დიდ მადლობას ვუხდით ნეო ტვ-ის თანამშრომლებს და მის ხელმძღვანელს, ნინო ჩიბჩიურს. ნეო ტვ – ში სტუმრობის მიზეზიც მოსწავლეების დიდი ინტერესიდან გამომდინარე დაიგეგმა. -აღნიშნა კლასის ხელმძღვანელმა, ნანა სხირტლაძემ.
