მოხალისეები კარიტასის მხარდაჭერით გაჭირვებულ ადამიანებს ეხმარებიან. კარიტასი მთელი ქვეყნის მასშტაბით ახორციელებს სხვადასხვა სოციალურ პროგრამას და ეხმარება: ობლებს, იძულებით გადაადგილებულ პირებს, უსახლკაროებს, მარტოხელა მოხუცებს, სოციალურად დაუცველ პირებს, სტიქიური მოვლენების და შეიარაღებული კონფლიქტების შედეგად დაზარალებულ პირებს, ქუჩასთან კავშირში მყოფ ბავშვებს და სიღარიბის ზღვარს მიღმა მყოფ ადამიანებს. ორგანიზაცია საახალხწლოდ, საქველმოქმედო აქციის განხორციელებას გეგმავს გორშიც, რისთვისაც მოხალისეებს იწვევს.
“კვირაში რამდენიმე საათიან მოხალისეობრივ მუშაობას შეუძლია შეცვალოს ადამიანის ცხოვრება. კარიტასის მოხალისეებს აქვთ შესაძლებლობა თავისი წვლილი შეიტანონ და ჩაერთონ საქველმოქმედო პროექტების დაგეგმვისა და განხორციელების პროცესში. ამ ეტაპზე გვჭირდება დახმარება ტანსაცმლის დახარისხების და გაცემის პროცესში, ასევე საახალწლო კამპანიის განხორციელებაში, რომლის ფარგლებშიც მარტოხელა სოციალურად დაუცველ მოხუცებს შევუძენთ პირველადი საჭიროების პროდუქტებს”, -ამბობს, გორის მოხალისეების ოფიცერი, ნათია სიდამონიძე.
საახალწლო კამპანიას, “გაუზიარე ახალი წელი” გორის მუნიციპალიტეტის სოფელ ტინისხიდის საჯარო სკოლის მოსწავლეებიც შეუერთდნენ. მათთან ერთად, “კარიტასის” მოხალისეებმა საახალწლო დეკორაციები დაამზადეს. მათ შორის საყოფაცხივრებო ნარჩენებისგან (გადამწვარი ნათურა, პოლიეთილენის პარკი) დაამზადეს მისალოცი ბარათები, რომლებიც საახალწლოდ, უშუალოდ პროექტში ჩართულ მოქალაქეებს გადაეცემათ. ორგანიზატორთა განმარტებით, საახალწლო კამპანია მიზნად ისახავს 31 დეკემბრამდე, ახალი წლის დეკორაციების შეგროვებას, მათ გაყიდვას და შემოსული თანხით გორში მცხოვრები მარტოხელა მოხუცებისთვის პირველადი საჭიროების პროდუქტების შეძენას.
აქციაში ჩართვა დაინტერესებულ პირებს შემდეგი სააპლიკაციო ფორმის შევსების შედეგად შეეძლებათ:
https://docs.google.com/forms/d/e/1FAIpQLScISGl1fd1xyRqQgJ2CMOJ3fWHkU6kxNfpoc9lFy0OR4bVP8g/viewform
