საქართველოში მყოფ უკრაინელ ლტოლვილებს შეუძლიათ ჯანდაცვის სამინისტროს რეფერალური პროგრამით სარგებლობა, ისევე როგორც საქართველოს მოქალაქეთა კონკრეტულ ჯგუფებს. ეს საკითხი ნეო ტვ-ს მიერ ორგანიზებულ შეხვედრაზე უკრაინელებს ჯანდაცვის სამინისტროს რეგიონულმა წარმომადგენელმა, თამარ მელიქიამ გააცნო. როგორც აღმოჩნდა, ამის შესახებ შიდა ქართლში მცხოვრები უკრაინელებისთვის უცნობი იყო და სამედიცინო დაწესებულებაში ვიზიტს ფინანსური კრიზისის გამო ვერ ახერხებდნენ. მელიქიამ მათ დეტალურად აუხსნა პროგრამით სარგებლობის ეტაპები და საჭიროების შემთხვევაში დახმარებას დაპირდა.
“საქართველოში მყოფ უკრაინის მოქალაქეებს შეუძლიათ მიმართონ სამედიცინო დაწესებულებას, მიიღონ საჭირო გამოკვლევების ჩამონათვალი და შემდეგ ამ დოკუმენტით ჩაიტარონ ყველა საჭირო პროცედურა, რასაც რეფერალური პროგრამა ითვალისწინებს“,-განმარტა თამარ მელიქიამ.
რეფერალური მომსახურების სახელმწიფო პროგრამა მიზნად ისახავს საქართველოს მოქალაქეებისათვის საჭირო სამედიცინო მომსახურებების დაფინანსებას, როგორც საქართველოში, ისე მის ფარგლებს გარეთ (ასეთის აუცილებლობის შემთხვევაში). ამ პროგრამით მოსარგებლეთა შორის შეიძლება იყვნენ სტიქიური უბედურებების, კატასტროფების, საგანგებო სიტუაციების დროს დაზარალებული მოსახლეობა, თუ ეს ხარჯები არ იფარება სხვა სახელმწიფო პროგრამების ან დაზღვევის მეშვეობით;ასევე ის პირები, რომლებიც “ოკუპირებული ტერიტორიების შესახებ“ საქართველოს კანონის მე-2 მუხლისა და მე-10 მუხლის მე-2 პუნქტით გათვალისწინებულ ტერიტორიებზე მცხოვრები საქართველოს მოქალაქეები და საქართველოში მუდმივად მცხოვრები მოქალაქეობის არმქონე პირები, საქართველოს მოქალაქეობის დამადასტურებელი ან შესაბამისი ოფიციალური დოკუმენტის ქონის მიუხედავად.
