ქარელის მუნიციპალიტეტის ბიუჯეტში ახალი პროგრამა დამტკიცდა, რომელიც ოჯახში
ძალადობის მსხვერპლთათვის ერთჯერად ფულად დახმარებას ითვალისწინებს. 2024
წლიდან მერია აღნიშნული მიმართულებით 15 ათასი ლარის დახარჯვას გეგმავს.
“2024 წელს გათვალისწინებულია ქარელის მუნიციპალიტეტში რეგისტრირებული პირის
დახმარება, რომელიც სასამართლოს კანონიერ ძალაში შესული გამამტყუნებელი განაჩენით
აღიარებული იქნა ოჯახური ძალადობის მსხვერპლად. ფინანსური დახმარება გაიცემა
წელიწადში ერთჯერადად 500(ხუთასი)ლარის ოდენობით”, – წერია 2024 წლის ფინანსურ
დოკუმენტში.
მუნიციპალიტეტში ფიქრობენ, რომ ბიუჯეტიდან ძალადობის მსხვერპლებისთვის თანხის
გაცემის შედეგად, კონკრეტული შემთხვევები და საჭიროებები გამოვლინდება.
ამ დრომდე ქარელი ერთადერთი მუნიციპალიტეტი იყო შიდა ქართლში, რომლის ბიუჯეტიც
ოჯახში ძალადობის მსხვერპლთა დახმარებას არ ითვალისწინებდა. ახალი წლიდან კი
ქარელის მერია წელიწადში ერთხელ ამ კატეგორიის ბენეფიციარებისთვის ერთჯერად
ფინანსურ დახმარებას გასცემს.
