“ევროკავშირში გაწევრიანება საქართველოს, ოკუპირებულ ტერიტორიებთან ერთად შეუძლია და მსგავსი არაერთი მაგალითი არსებობს” – ამ თემას ეხებოდა ნათია სიდამონიძის მიერ მომზადებული მასალა, რომელმაც ჟიურის მოწონება დაიმსახურა და გამარჯვებულის ტიტულიც მოიპოვა. მისი თქმით, რუსეთის პროპაგანდისტული ჯგუფების მიერ გავრცელებული მითების დამსხვრევა, ახალგაზრდებს სწორედ მსგავსი ნამუშევრების მომზადებით შეუძლიათ. ის აპირებს რომ მოძიებული ფაქტები ევროკავშირის შესახებ, საკუთარ თემში მცხოვრებ მოსახლეობას გაუზიაროს.
ნათიასთან ერთად ჯამში 12 მასალის პრეზენტაცია გაიმართა, რომელსაც ერგნეთში, “აგვისტოს ომის მუზეუმმა” უმასპინძლა.
გავრცელებული მითების საპასუხოდ მომზადებული ვიზუალიზაციები ეხებოდა, როგორც პოლიტიკის და ეკონომიკის, ისე კულტურის და განათლების თემებს. პროექტის მონაწილეებმა საჯარო ინფორმაციისთვის პორტალი askgov.ge გამოიყენეს და მონაცემები საკუთარ ნამუშევრებში ასახეს.
პროექტი “ღია მონაცემების ჰაბი ევროინტეგრაციისთვის” ნეო ტვ-მ “ფორსეტის” მხარდაჭერით განახორციელა. მოკლე დროის მიუხედავად, ორგანიზაციამ არაერთი საინტერესო აქტივობა დაგეგმა, მათ შორის ტრენინგ-სემინარები, გადაცემები, მასტერკლასები და ა.შ. დასკვნით ღონისძიებას პარტნიორი ორგანიზაციის წარმომადგენელიც ესწრებოდა, რომელმაც ურთიერთთანამშრომლობის მნიშვნელობაზე ისაუბრა.
12 – ვე ნაშრომი ნეო ტვ-ს სპეციალურ რუბრიკაშია (EU) განთავსებული და მისი ნახვა ნებისმიერ დაინტერესებულ პირს შეუძლია. თავად მონაწილეებს კი პროექტის წარმომადგენლებისგან ტრენერის სერტიფიკატები გადაეცათ, რაც იმას ნიშნავს, რომ წარმოდგენილ მასალებს ისინი საზოგადოების სხვადასხვა ჯგუფებთან, სხვადასხვა ფორმით გააზიარებენ და თანასოფლელელბის შეკითხვებსაც უპასუხებენ.
