NEO TV – ს რჩეული, მერი კორინთელი ინგლისურ ენას უფასოდ შეისწავლის. ინიციატივა “ენების ინოვაციური აკადემიის”ხელმძღვანელმა, ნინო ღარიბაშვილმა NEO FEST – ს დასკვნით ღონისძიებაზე გააჟღერა. მისი განმარტებით, საოკუპაციო ხაზთან მდებარე სოფლებში მცხოვრები ქალები, რომლებიც მუდმივი განვითარებისკენ არიან ორიენტირებულები განსაკუთრებული მხარდაჭერა და ხელშეწყობა სჭირდებათ. მისი აღნიშნული შეთავაზებაც სწორედ ამ მიზანს ემსახურება.
“მერი კორინთელი, ცხოვრობს სოფელში, რომელიც ძალიან ახლოსაა საოკუპაციო ხაზთან. მისი პრეზენტაციიდან მოვისმინეთ, რომ ქალები სისტემატურად ტოვებენ მშობლიურ მხარეს და ემიგრაციაში მიდიან. Neo Fest – ის ღონისძიებაზე მან ისაუბრა თუ რა დიდ მანძილს გადის, უმეტესად ფეხით, რომ ასეთ პროექტებში ჩაერთოს და შემდეგ მიღებული ცოდნა თანასოფლელებსაც გაუზიაროს. ამიტომ ვთვლი, რომ მერის და მის მსგავს ძლიერ ქალებს, რომლებიც არსებული ვითარების მიუხედავად სოფელს ამაგრებენ და რჩებიან ადგილზე მხარდაჭერა და ხელშეწყობა სჭირდებათ,”-აღნიშნა ნინო ღარიბაშვილმა.
მერი კორინთელის დღევანდელი პრეზენტაცია საოკუპაციო ხაზთან მდებარე სოფელ აძვიდან, ქალების და ზოგადად ოჯახების მასიურ გადინებას ეხებოდა. რომლის შესახებაც ინფორმაცია კარდაკარ გამოკითხვის პრინციპით, საკუთარ სოფელში თავად შეაგროვა.
