პირველი მარტიდან, გორის მუნიციპალიტეტის 10 სკოლაში ფსიქოლოგები იმუშავებენ. იდეის ავტორი ნეო ტვ-ია, რომელიც საწყის ეტაპზე, საპილოტე სკოლებს კონკურსის წესით შეარჩევს. ორ საათიან შეხვედრებზე კვალიფიციური სპეციალისტები ცალ-ცალკე იმუშავებენ მოზარდებთან, პედაგოგებთან და მშობლებთან. დაინტერესებული სკოლების წარმომადგენლებმა, 2024 წლის 25 თებერვლამდე უნდა შეავსონ შემდეგი სააპლიკაციო ფორმა: https://forms.gle/JyaiJmZ4Ne94h8HK8
“საზოგადოების ნაწილში, განსაკუთრებით უფროს თაობაში ფსიქოლოგის საჭიროება არასწორადაა აღქმული და ხშირად “ფსიქიატრთანაა” გაიგივებული. მშობლები/მეურვეები ზოგჯერ სპეციალისტის საჭირობაზე საკუთარ თავსაც არ/ვერ უტყდებიან და საკითხისადმი არასწორი დამოკიდებულებით და საკუთარი „უმოქმედობით”, ისედაც არასახარბიელო ვითარებას ხელს გაუაზრებლად უწყობენ. თანამედროვე ტექნოლოგიურ ეპოქაში დღეს ინფორმაციის მოძიება და საჭირო რეკომენდაციების გაცნობა პრობლემას არ წარმოადგენს, მაგრამ წაკითხული და გააზრებული ინფორმაციის პრაქტიკაში გამოყენება სწორედ ამ “არაღიარების” მიზეზითაა უგულებელყოფილი. წარმოდგენილი პროექტი სწორედ ამ ვითარების გამოსწორებისკენაა მიმართული”, -აცხადებენ პროექტის ავტორები.
პროექტი გორის მუნიციპალიტეტის მერიის მიერ განათლების, კულტურული, სპორტული და ახალგაზრდული ღონისძიებების ხელშეწყობის პროგრამის ფარგლებშია მხარდაჭერილი.
