საოკუპაციო ხაზთან მდებარე სოფელ დირბში ადგილობრივ ქალებს ტრენინგი ჩაუტარდათ თემაზე “უსაფრთხოება ონლაინ და ფიზიკურ სივრცეში”. შეხვედრას GMG-ს კიბერუსაფრთხოების ჰაბის წარმომადგენელი, ნათია სიდამონიძეუძღვებოდა.
“ვისაუბრეთ იმ მინიმალური სტანდარტების შესახებ, რომლებიც მნიშვნელოვანია როგორ ონლაინ, ისე ფიზიკურ სივრცეში უსაფრთხოების შესანარჩუნებლად, დიდი ინტერესი გამოიწვია კიბერდანაშაულების თემამ და მისი თავიდან აცილების საშუალებებმა”,-ამბობს ნათია სიდამონიძე.
შეხვედრის თემა მოიცავდა სექსუალური შევიწროებისა და გენდერული უსაფრთხოების საკითხებსაც როგორც ონლაინ ისე ფიზიკურ სივრცეში, რომლის შესახებაც დამსწრე აუდიტორია აქტიურად გამოხატავდა საკუთარ მოსაზრებებს და დამოკიდებულებებს დისკუსიის ნაწილში.
“შეხვედრას ჰქონდა ინტერაქტიული ხასიათი, განვიხილეთ პრაქტიკული მაგალითებიც. ტრენინგის ბოლოს, მონაწილეებმაც აღნიშნეს, რომ მსგავს საკითხებზე გამართული დისკუსია და საინფორმაციო შეხვედრები განსაკუთრებით მნიშვნელოვანია დღევანდელი გამოწვევების საპასუხოდ. მნიშვნელოვანია, რომ მონაწილეთა შორის იყვნენ ისეთები, რომლებსაც მსგავს თემებზე არასოდეს გაუვლიათ რაიმე სახის ტრენინგ-სემინარი. ისინი ამბობდნენ, რომ მიღებულ ცოდნას საქმიანობის დროსაც გამოიყენებენ და სხვებსაც გაუზიარებენ. განსაკუთრებული ინტერესი მათში ფიშინგზე საუბარმა გამოიწვია. მონაწილეებმა გამიზიარეს საკუთარი მაგალითები, გაიხსენეს შემთხვევები, როდესაც თავად ჰქონდათ მსგავს შემთხვევებთან შეხება. ასევე აღსანიშნავია, რომ მათ ტრენინგის
შედეგად უკვე გააანალიზეს თუ რა ნიშნებით ხდება სექსუალური შევიწროების
იდენტიფიცირება, ფიზიკურ და ონლაინ სივრცეში“,-აღნიშნა ნათია სიდამონიძემ.
ქარელის მუნიციპალიტეტში შეხვედრა ევროკავშირის მიერ მხარდაჭერილი პროექტის ფარგლებში მოეწყო, რომელსაც ნეო ტვ ახორციელებს “ქალთა ფონდთან” პარტნიორობით. პარალელურად მიმდინარეობს ადგილობრივი საჭიროებების შესწავლა მათი შემდგომი ადვოკატირების მიზნით გადაწყვეტილების მიმღებ პირებთან.
