საჯარო ინფორმაციის ხელმისაწვდომობის თემას დაეთმო შეხვედრა, რომელსაც გორში “ქართულმა მედია ჯგუფმა” უმასპინძლა. ჟურნალისტებსა და არასამთავრობო სექტორის წარმომადგენლებს მხარდაჭერას ამ მიმართულებით მედიის ინფორმაციის და სოციალური კვლევების ცენტრი უწევს, რაზეც უფრო ვრცლად შეხვედრაზე, ამ ორგანიზაციის წარმომადგენელმა, მამუკა ანდღულაძემ ისაუბრა.
როგორც შეხვედრის მონაწილე ჟურნალისტებმა აღნიშნეს, საჯარო უწყებების მხრიდან საჯარო ინფორმაციის გაცემა ხშირად ჭიანურდება, რაც მათ საქმიანობის შეფერხებას იწვევს. მათი განმარტებით, მედია სასურველ ინფორმაციას დაგვიანებით, არასრულად, ან საერთოდ ვერ იღებს.
შეხვედრა პროექტის, „მედიის თავისუფლების ხელშეწყობა და მოქალაქეთა მონაწილეობის გაზრდა საჯარო ინფორმაციის ხელმისაწვდომობის გზით“ ფარგლებში, საქართველოში ა.შ.შ. საელჩოს დემოკრატიის კომისიის მცირე გრანტების პროგრამის ფინანსური მხარდაჭერით. მედიასთან ერთად საჯარო ინფორმაციის ხელმისაწვდომობაზე რეკომენდაციებს გორში სამოქალაქო საზოგადოების წარმომადგენლებიც ისმენდნენ.
როგორც შეხვედრაზე აღინიშნა პროექტის ითვალისწინებს ხელი შეუწყოს მედიას და მოქალაქეებს საჯარო ინფორმაციაზე წვდომის კუთხით, გააძლიეროს მოქალაქეთა ჩართულობა გადაწყვეტილების მიღების პროცესში და გაზარდოს მთავრობის ანგარიშვალდებულება და გამჭვირვალობა. ამ მიზნით, პროექტის ავტორები საზოგადოებასთან შეხვედრებს საქართველოს სხვადასხვა რეგიონში მართავენ.
