გორის მუნიციპალიტეტის სოფლებში – ბროწლეთში, ტყვიავში, ტირძნისში, ფხვენისში, კარალეთში, ქიწნისში, ქვემო ხვითსა და შავშვებში სასმელი წყლის ხარისხი შეამოწმეს. ორგანოლეპტიკური,
ფიზიკურ-ქიმიური და მიკრობიოლოგიური ანალიზი სამოქალაქო განვითარების ახალგაზრდული ცენტრის პროექტის ფარგლებში გაკეთდა, რომელსაც USAID – უჭერს მხარს. აღმოჩნდა, რომ 8 დან 5 სოფელში სასმელი წყალი დადგენილ ჰიბიენურ ნორმებს არ აკმაყოფილებს.
“სოფლების: ქიწნისის, ფხვენისის და შავშვების სასმელი წყლების
მიკრობული დაბინძურება არ აღინიშნა (გამოცდის ოქმები NN7426, 7434, 7436). კარალეთის,
ტყვიავის, ტირძნისის, ბროწლეთის, ქვემო ხვითის სასმელი წყლები განსაზღვრული
მიკრობიოლოგიური მაჩვენებელების მიხედვით დაბინძურებულია და არ შეესაბამება „სასმელი
წყლის ტექნიკური რეგლამენტი“-ს მოთხოვნებს (საქართველოს მთავრობის 2014 წლის 15 იანვრის
No58 დადგენილება, გამოცდის ოქმები NN7425, 7427, 7428, 7429, 7435). ამ წყლების მოხმარება
სასმელ-სამეურნეო მიზნებისათვის მიზანშეწონილი არ არის წყლის ფაქტორით გამოწვეული
ბაქტერიული, ვირუსული და პარაზიტული დაავადებების გაზრდილი რისკის გამო”, – წერია შპს „გ. ნათაძის სახ. სანიტარიის, ჰიგიენის და სამედიცინო ეკოლოგიის სამეცნიერო-კვლევითი ინსტიტუტის” დასკვნაში.
“სამოქალაქო განვითარების ახალგაზრდულმა ცენტრის” დაკვეთით ჩატარებული კვლევის შედეგებზე ორგანიზაციის წარმომადგენელმა შოთა ბუჩუკურმა ისაუბრა, გადაცემაში “ფაქტი”.
