ოკუპირებული ტერიტორიასთან მდებარე სოფელში სამედიცინო აქცია მოეწყო. ასოციაცია ჰერა XXI-ის ინიციატივით, ციფრული ტექნოლოგიების სააგენტო NEO TV -ისა და ზურაბ საბახტარაშვილის რეპროდუქციულ კლინიკასთან თანამშრომლობით, გორის მუნიციპალიტეტის, ოკუპირებული ცხინვალის გამყოფ ხაზთან მდებარე სოფელში, ერგნეთ-მამისაანთუბნის საჯარო სკოლის შენობაში, ჩატარდა გასვლითი უფასო ვიზიტი ოჯახის ექიმის, გინეკოლოგ- რეპროდუქტოლოგის, ექოსკოპისტისა და ფსიქოლოგის ჩართულობთ.
კონსულტაციაზე მისული მოსახლეობა აღნიშნავს, რომ სოფელში არის სოფლის ექიმი, თუმცა წვდომა მის სერვისზე ფრაგმენტულია. არ აქვთ ტერიტორიული ხელმისაწვდომობა აფთიაქსა და ლაბორატორიულ კვლევებზე, რის გამოც უწევთ ქალაქ გორში ან სოფელ ტყვიავში წასვლა. აღნიშნულს ამწვავებს ის ფაქტი, რომ მოსახლეობას საზოგადოებრივი ტრანსპორტი არ ესახურება სტაბილურად და მოწესრიგებულად, რაც უქმნით დამატებით გეოგრაფიულ და ფინანსურ ბარიერებს.
არ არიან ინფორმირებული სახელმწიფოში მოქმედ ჯანდაცვის პროგრამებზე, მათ შორის უფასო წამლების პროგრამაზე ქრონიკული დაავადებების მქონე პაციენტებისთვის (ჰიპერტონული დაავადება, გულის ქრონიკული უკმარისობა, არითმიები, შაქრიანი დიაბეტი, დიფუზურ- კვანძოვანი ჩიყვი) და უწევთ თბილისში გამოწერილი ძვირადღირებული ალტერნატიული მედიკამენტების შეძენა.
