როგორ ვაქციოთ მოპოვებული ინფორმაცია უფრო მიმზიდველად თანამედროვე ტექნოლოგიების გამოყენებით? – ამ თემაზე ჟურნალისტებს უცხოეული ექსპერტები გამოცდილებას უზიარებენ. პრაქტიკის ნაწილში კი სხვადასხვა რეგიონისთვის დამახასიათებელ აქტუალურ საკითხებს, მონაწილეთა პრეზენტაციებიდან ეცნობიან და მათი ეფექტურად გაშუქების გზებს სთავაზობენ. შიდა ქართლიდან 5 დღიან შეხვედრას ირინა ხმიადაშვილი და ლიკა თოთლაძე ესწრებიან. მათ საკუთარი გამოსვლის დროს, საოკუპაციო ხაზთან მცხოვრები მოქალაქეების მდგომარეობაზე გაამახვილეს ყურადღება და ამ პროცესში მედიის როლზე ისაუბრეს.
პროექტი, რომლის ფარგლებშიც აღნიშნული ღონისძიება მიმდინარეობს ევროკავშირის მიერაა მხარდაჭერილი და მისი მთავარი მიზანია ეთიკური და პროფესიული მედია გარემოს შექმნა ცენტრალურ და აღმოსავლეთ ევროპაში. კონკრეტულად კი გათვალისწინებულია პროფესიონალური მედიასაშუალებებისსთვის სპეციალური ქსელის შექმნა, რომელიც გაზრდის სარედაქციო შესაძლებლობებს და მხარს დაუჭერს სიცოცხლისუნარიანობის გაზრდას, დამოუკიდებელი მედია საშუალებებისთვის აღმოსავლეთ და ცენტრალური ევროპის ქვეყნებში, გამოცდილების გაცვლის, ურთიერთსწავლისა და თანამშრომლობის ინიცირებით, მრავალფეროვანი,სანდო, მაღალი ხარისხის ჟურნალისტიკის განვითარების გზით.
“შეხვედრები მიზნად ისახავს ციფრული ტრანსფორმაციის ფონზე, სხვადასხვა ტიპის მედია საშუალებების აღჭურვას და მათ გაძლიერებას საჭირო მეთოდოლოგიებითა და პრაქტიკული ინსტრუმენტებით. რათა მათ ეფექტურად გააგრძელონ საკუთარი საქმიანობა თანამედროვე გამოწვევების პარალელურად, აუდიტორიის მოზიდვის და მათთვის საინტერესო საკითხების ეფექტურად გაშუქების მიმართულებით“-აცხადებენ ღონისძიების ორგანიზატორები.
