თამარ ბიგანიშვილი
რამდენიმე დღის წინ შეხვედრა მქონდა დევნილ მოსახლეობასთან, NEO TV-ს პროექტის ფარგლებში, რომელიც “სამართლიან არჩევნებთან” (ISFED) პარნიორობით, ევროკავშირის მხარდაჭერით ხორციელდება. ჩემი დაკვირვებით, სოფლებში რადიკალურად განსხვავებული სიტუაციაა, ვიდრე აქამდე, წინასაარჩევნო პერიოდში ყოფილა.
ამ მომენტისთვის უკვე გამძაფრებით იგრძნობა სამთავრობო აგიტატორების მიერ მოსახლეობის “მოსყიდვის” მცდელობა სხვადასხვა საშუალებებით. სხვა წლებთან შედარებით, მოსახლეობის დიდი ნაწილი აგრესიულადაა განწყობილი პოლიტიკური საკითხების ხსენებისას. ერიდებიან პირდაპირ კომუნიკაციას და დასახლება მკვეთრად არის დაყოფილი პოზიცია/ოპოზიციად.
შეხვედრაზე რეგისტრაცია ძალიან ბევრმა ადამიანმა არ გაიარა, სხვადასხვა მიზეზის გამო, თუმცა გაჟღერებული საკითხები აინტერესებდათ და კითხვებსაც სვამდნენ. უნდა აღინიშნოს, რომ წელს პირველად, “არასამთავრობო ორგანიზაციების” ხსენებისას მათი ნაწილი კომუნიკაციას ერიდებოდა, იყვნენ ისეთებიც, რომლებსაც დონორი ორგანიზაციებისგან და სამოქალაქო საზოგადოების მხარდაჭერით, არაერთი სიკეთე აქვს მიღებული. ასევე უარი განაცხადეს ფოტოს გადაღებაზე ისეთმა ადამიანებმაც, რომელიც არასამთავრობო სექტორის მიმართ კეთილგანწყობილი არიან.
დამრჩა შთაბეჭდილება, რომ ეს ყველაფერი მიზანმიმართულად გავრცელებული დეზინფორმაციული ნარატივებითაა გამოწვეული, რადგან დევნილთა დასახლებებში 2008 წლის შემდეგ აქტიურად ვარ ჩართული სამოქალაქო აქტივიზმში და მსგავსი არაფერი მახსენდება. პირიქით, მოსახლეობა არასამთავრობო ორგანიზაციების დანახვისას, იმედს და მხარდაჭერას გრძნობდა, რასაც მათივე თქმით, ხელისუფლების მხრიდან არ იღებდნენ. ზოგიერთი მათგანი ადგილობრივ ხელისუფლებაზე უკეთესად სამოქალაქო სექტორის წარმომადგენლებს იცნობდა.
მოსახლეობასთან შეხვედრისას, შედარებით ნეიტრალური მხარეებისგან, გამოიკვეთა უიმედობა, ფრაზებით “მაინც არაფერი გვეშველება” , “აზრი არ აქვს”. ჩვენი მიზანი სწორედ საარჩევნო ხმის მნიშვნელობის გააზრება იყო, გავაცანით არაერთი მაგალითი, თუ რატომ აქვს აზრი მათ ჩართულობას და აქტიურობას ქვეყნის უკეთესი მომავლისთვის. მაქსიმალურად ვეცადე მარტივად და გასაგებად მიმეცა სტიმული და მომეწოდებინა მათთვის არჩევნებზე წასულიყვნენ.
მოსახლეობის ის ნაწილი, ვინც ვინაობას ღიად აფიქსირებდა, სრულიად იაზრებდა საკუთარ პასუხისმგებლობას ამ პროცესების მიმართ და მზაობას გამოთქვამენ 26 ოქტომბერს, დააფიქსირონ საკუთარი პოზიცია.
