საბჭოთა კავშირის დაშლის შემდგომმა კრიზისმა, საზოგადოებაში მნიშვნელოვანი ნეგატიური ცვლილებები გამოიწვია და საქართველო, როგორც დამოუკიდებელი სახელმწიფო, ბევრი გამოწვევის წინაშე დააყენა. წლების მანძილზე, ახალგაზრდების მომავალი მათი და შესაბამისი დარგის ექსპერტების, ჩართულობის გარეშე იგეგმებოდა. თუმცა, ამ გეგმებს განხორციელება მაინც არ ეწერათ და მხოლოდ ფურცელზე რჩებოდა. ამ კუთხით, ცვლილებები 2009 წლიდან იწყება. სწორედ ამ დროს ხდება კონკრეტული ნაბიჯების გადადგმა, რაც ახალგაზრდების განვითარებისათვის ღირსეული გარემოს შექმნას გულისხმობდა, იმისთვის, რომ მათ თავის მხრივ, სახელმწიფოს წარმატებული მომავლის შენებაში საკუთარი წვლილი შეეტანათ.
მიუხედავად ათწლეულის გასვლისა, ეს სფერო კვლავ დიდი გამოწვევების წინაშე დგას, რაც ბოლო კვლევებითაც დასტურდება. ახალგაზრდების გადინება ქვეყნიდან თუ რეგიონებიდან საკმაოდ მაღალია. ამას ემატება NEET ჯგუფის პროცენტული მაჩვენებელი, რომელიც სხვადასხვა კვლევით 32%-ზე მეტია. პანდემიის შემდეგ ეს რიცხვი სავარაუდოდ კიდევ გაიზარდა, რაც ევროკავშირის ქვეყნების მაჩვენებელს 3-ჯერ აღემატება. ევროკავშირის ქვეყნებში პასიური ახალგაზრდების რაოდენობა 12%-საც არ სცდება.
რა ხდება ამ მხრივ საქართველოს რეგიონებში და რა განაპირობებს ახალგაზრდების “ჩრდილში მოქცევას” – ამ კითხვებზე პასუხების გაცემას “ახალგაზრდა მკვლევართა და ანალიტიკოსთა გაერთიანება” შეეცადა. ის ქვეყნის მასშტაბით პირველი აღმოჩნდა, რომელმაც NEET ახალგაზრდების შესახებ რეგიონალურ დონეზე კვლევა ჩაატარა.
