ე.წ უცხოური გავლენის აგენტების შესახებ კანონპროექტის დამტკიცების შემთხვევაში, გორის მერია სამოქალაქო საზოგადოებასთან ურთიერთობაში ცვლილებების განხორციელებას არ გეგმავს. განათლების განყოფილების ხელმძღვანელის, ნინო ბერიანიძის განცხადებით, მუნიციპალური პროგრამების ფარგლებში არსებობს მჭიდრო კოორდინაცია პროექტების წარმომდგენ უწყებებთან, მათ შორის არასამთავრობო ორგანიზაციებთან და მისი აზრით, ამ თანამშრომლობის გაგრძელებას ხელს აღნიშნული კანონი ვერ შეაფერხებს.
“ეს თანამშრომლობა არის ძალიან ნაყოფიერი და ორიენტირებულია სწორედ კლასგარეშე აქტივობების თუ ახალგაზრდული ინიციატივების განხორციელებაზე არაფორმალური განათლების ჭრილში. აღნიშნულ კანონპროექტს არ ვიცნობ, მაგრამ ერთი რამ შემიძლია ვთქვა, ფასდაუდებელია არასმთავრობო სექტორის როლი ქვეყნის განვითარების საქმეში სხვადასახვა მიმართულებით. 2008-2010 წლებში თავად ვიყავი ორგანიზაცია Save the children -ის ერთ-ერთ პროექტში ჩართული, რომლის მიზანიც იყო ბავშვთა ძალადობისგან დაცვის რეფერალური სისტემის შემუშავება და აღნიშნული კანონპროექტის პილოტირება. ვამაყობ, რომ ამ საქმეში მეც მცირე წვლილი მაქვს შეტანილი”,-აღნიშნა NEO TV -სთან საუბარში ნინო ბერიანიძემ.
