ნეო ტვ – ს გუნდი ქალთა მიმართ ძალადობის წინააღმდეგ მიმართულ კამპანიას უერთდება და სოფლად მცხოვრებ ქალებთან და ახალგაზრდებთან ტრენინგ-სემინარებს მართავს. “ქალთა ფონდის” მიერ მხარდაჭერილი პროექტის ფარგლებში პირველი ასეთი შეხვედრა, გორის მუნიციპალიტეტის სოფელ თედოწმინდაში მოეწყო. ეთნიკური უმცირესობებით დასახლებულ თემში ამბობენ, რომ ენობრივი ბარიერის გარდა, ადგილობრივები ყოველდღიურად არაერთ სირთულეს ხვდებიან.
ქალთა საჭიროებებზე პროექტის გუნდი შიდა ქართლის მასშტაბით, სპეციალურ კვლევასაც ატარებს, რომლის შედეგები გაზაფხულისთვის გამოქვეყნდება. მანამდე კი სხვადასხვა თემაზე დაგეგმილი შეხვედრები მინიმუმ 150 მონაწილეს მოიცავს, რომლებსაც არსებულ სერვისებზე, დამცავ მექანიზმებსა და უსაფრთხოების შესაძლებლობებზე ინფორმაციას ადგილზე ჩასული კომპეტენტური პირები მიაწვდიან.
