“ვიღვიძებთ ტელეფონით, ვიძინებთ ტელეფონით.. “იტერნეტის გარეშე ცხოვრებას ერთ დღეც ვერ ვძლებთ”, – რას ნიშნავს ეს და როგორ აისახება ადმიანზე ასეთი დამოკიდებულება? – ამ თემასთან დაკავშირებით ტრენინგი დღეს ტინისხიდის საჯარო სკოლაში ჩატარდა, რომელსაც GMG-ს კიბერუსაფრთხოების ჰაბის წარმომადგენელი, ნათია ჯანეზაშვილი უძღვებოდა. შეხვედრას ძირითადად მოსწავლეები ესწრებოდნენ, თუმცა თემის აქტუალობიდან გამომოდინარე სპეციალისტისგან რეკომენდაციების მოსმენის სურვილი პედაგოგებმაც გამოთქვეს.
“დღევანდელი შეხვედრის ფარგლებში განვიხილეთ ელექტრონული გაჯეტების არსი, მათი უპირატესობები და ნაკლოვანებები, ასევე – ელექტრონულ მოწყობილობათა სასარგებლო მიზნით გამოყენების მაგალითები. ტრენინგის მონაწილეებს გავაცანი ონლაინ უსაფრთხოების წესები, რომელთა გათვალისწინება მეტ დაცულობას უზრუნველყოფს ვირტუალურ სამყაროში. მოსწავლეების კითხვები ძირითადად ონლაინ სივრცეში მოსალოდნელი თავდასხმისგან თავის დაცვას ეხებოდა, მაგალითად, როგორიცაა ფიშინგი, სწორედ ამიტომ ყურადღება დაცული საიტებით სარგებლობასა და თითოეული საიტის გადამოწმებაზე გავამახვილე”, – აღნიშნა ნათია ჯანეზაშვილმა.
ტინისხიდის საჯარო სკოლამდე მსგავსი შეხვედრები ჩატარდა გორის მე-8 და მე-9 სკოლებში. სადაც პრეზენტაციები კიბერუსაფრთხოების ჰაბის კიდევ ორმა წარმომადგენელმა, ნათია სიდამონიძემ და ლიკა ომაძემ გააკეთეს. სკოლებში სპეციალისტების ვიზიტები ნეო ტვ- პროექტის ფარგლებში, გორის მერიის მხარდაჭერით განხორციელდა.
