თანამედროვე სამყაროში ქალის როლი მნიშვნელოვნად გაზრდილია. ის ერთდროულად ითავსებს მეუღლის, დედის, პროფესიონალის, ორგანიზატორისა და ოჯახის მენეჯერის პოზიციას. ფსიქოლოგი ეკა მენაბდიშვილი ხაზგასმით საუბრობს იმაზე, რომ ყველა ეს პასუხისმგებლობა ქალმა მხოლოდ მაშინ შეიძლება სრულფასოვნად შეასრულოს, როცა თავის თავზეც ზრუნავს და საკუთარი ემოციური და ფიზიკური რესურსების დაცლას არ უშინდება.
“ქალი არის წამყვანი ოჯახში, დღესდღეობით მაინც. ყველა შემთხვევაში ეს არ უნდა აკნინებდეს მის მდგომარეობას“, – ამბობს ეკა მენაბდიშვილი.
ფსიქოლოგი მოუწოდებს ქალებს, არ დაკარგონ საკუთარი თავი ყოველდღიურ საზრუნავსა და ოჯახის საჭიროებებში. ის განსაკუთრებით უსვამს ხაზს საკუთარ თავზე ზრუნვისა და პირადი დროის გამოყოფის მნიშვნელობას.
“პირველი არის ის, რომ ქალმა თავის თავზე ზრუნვა დაიწყოს თავისი დროის გამოყოფით საკუთარი თავისთვის”, — ამბობს მენაბდიშვილი.
ფსიქოლოგი ურჩევს ქალებს, ყოველდღე გამოყონ მინიმუმ ნახევარი საათი, რომელიც მხოლოდ მათ ეკუთვნით. ამ დროის განმავლობაში ქალი თვითონ წყვეტს, რას გააკეთებს — დაისვენებს, წაიკითხავს, სეირნობას აირჩევს, ან საკუთარ ფიქრებში ჩაფლული განიტვირთება.
“მნიშვნელოვანია, დღეში ნახევარი საათი მაინც ყველასთვის გასაგონად გამოაცხადოს ოჯახში, რომ აუცილებელია საკუთარ თავს დაუთმოს დრო“, — აღნიშნავს ეკა მენაბდიშვილი.
ამ დროის სარგებლიანობა არა მხოლოდ ემოციურ განტვირთვაშია, არამედ იმაში, რომ ქალს შესაძლებლობა ეძლევა, საკუთარი ენერგია აღიდგინოს და ოჯახს ისევ ხალისით და სითბოთი დაუბრუნდეს.
ფსიქოლოგი ხაზგასმით საუბრობს ფიზიკური ჯანმრთელობის მნიშვნელობაზეც:
“ფიზიკურ ჯანმრთელობაზე ზრუნვა აუცილებელია. შვილებსაც ჯანსაღი დედა სჭირდებათ, ოჯახის წევრებს ჯანსაღი ქალი სჭირდებათ.“
მისი რჩევით, ქალი აუცილებლად უნდა დაეხმაროს საკუთარ თავს იმით, რომ ფიზიკური აქტივობა, სწორი კვება და ჯანსაღი ცხოვრების წესი ყოველდღიურობასთან ერთად შეავსოს. ეს არა მხოლოდ მის ჯანმრთელობაზე აისახება, არამედ მის შვილებს და ოჯახის წევრებს მისცემს მაგალითს, რომ თვითზრუნვა ნორმალური და სასარგებლოა.
მენაბდიშვილი მიიჩნევს, რომ ქალის თვითდამკვიდრების და ემოციური კომფორტის შექმნა შვილებისთვისაც სასარგებლოა:
„ყველაფერი, რასაც ქალი გათვლის, რომ მნიშვნელოვანია მისთვის, ეს იქნება მოდელი მისი შვილებისთვისაც. ისინიც ჩათვლიან, რომ დედა ცალკე პიროვნებაა, მას სჭირდება ზრუნვა, მას სჭირდება საკუთარი თავის განვითარება“,
ამ მიდგომით, ბავშვები ადრეული ასაკიდან სწავლობენ, რომ საკუთარი თავის სიყვარული და ჯანმრთელობაზე ზრუნვა აუცილებელი და მისაღებია. დედა კი, რომელიც საკუთარ თავზე ზრუნავს, შვილებისთვის საუკეთესო მაგალითია.
